Ua quarantena d’autors de novèla negra e d’auti genres participaràn en Black Mountain Hestivau Culturau dera Val d’Aran, era setmana deth 27 d’abriu ath 3 de mai en Vielha, damb eth Parador de Torisme coma un des escenaris principaus e lotjament oficiau deth hestivau. Era programacion incluirà tanben projeccions de cine, debats, conferéncies, ua excursion, liurament de prèmis e un sopar de clausura en Parador de Vielha. Maugrat que era novèla negra ei era basa deth certamen, tanben i an cabuda auti genres coma era novèla istorica, de tèrra, umor, fantasia o poesia.

Entre es quasi cinquanta activitats programades, eth Parador acuelherà presentacions de libres coma Contra el olvido, memorias de Víctor Claudín; El instante en que se encienden las farolas d’Empar Fernández; Singagur d’Alfons Cervera; Los 39. El fuerte Navidad de José Luis Muñoz; Hilo de plata d’Águeda Rubio; Fondo buitre de Paco Gómez Escribano; Lady detective de José Antino Bonitta; De rosa a negro de Rebeca Murga; Cobre en la sangre de Lorenzo Lunar; La verdad es un vaso vacío de José Ramón Gómez Cabezas; El libro rojo d’Iván Humanes, e Lluvia de Cristal de Dolores Fernández Guerrero.

Tanben i aurà ua taula redona sus com bastir ua novèla policiaca damb Empar Fernández, Alejandro M. Gallo e Juan Infante, moderadi per Luis Artigue; debats sus psicòpates e sociòpates e sus escrivans “maudits”; ua jam session lirica damb diuèrsi poètes; conferéncies sus Gaza e sus era joenessa e era extrema dreta, e un concèrt de jazz deth duo Cangats.

Eth dia 3, eth hestivau acabarà damb eth liurament deth prèmi ara trajectòria a José Vaccaro Ruiz (1945), e deth prèmi Fernando Marías ara òbra publicada er an anterior a Víctor Claudín (1954) per Vivo en la oscuridad.